दाङका चन्द्रबहादुर डाँगी आफू विश्वको होचो व्यक्ति भएको दावी गर्दै काठमाडौं आइपुगेका छन् । विभिन्न विषयमा विश्व किर्तिमानको प्रमाणपत्र दिने गिनिज वल्र्ड रेकर्डका पदाधिकारी यसैसाता काठमाडौं आउने भएपछि डाँगी बुधबार काठमाडौं आएका हुन् ।७२ वर्षका डाँगीको उचाई ५६ सेन्टिमिटर अर्थात २२ इन्च दाबी गरिएको छ । विश्वको सबैभन्दा होँचो व्यक्तिको रुपमा अहिले फिलिपिन्सका जर्नी बालाविङ रहेका छन् र उनको उचाइ २३.५ इन्च छ । महिलाको हकमा भने २४.७ इन्च अग्ली भारतकी ज्योती अम्गे सबैभन्दा होँची महिलाको रुपमा रहेकी छिन् ।

डाँगीको उचाइ नाप्न गिनिजका अधिकारी नेपाल आउने निष्कर्षमा पुगेका गिनिज वल्र्ड रेकर्डको आधिकारिक वेबसाइटले पनि जनाएको छ । नेपालमा आएर डाँगीको स्वास्थ्य परिक्षण तथा उचाइको आधिकारिकताको विषयमा परिक्षणको लागि स्वास्थ्यकर्मीहरुसँग परामर्श थालिएको वेबसाइटमा उल्लेख छ ।

भ्रष्टाचारको आरोपमा लागेका सञ्चारमन्त्री जेपी गुप्तालाई डेढ वर्ष कैद सजाय र ८४ लाख जरिवाना तिराउन सर्वोच्च अदालतको आदेश । न्यायाधिशद्वय सुशीला कार्की र तर्कराज भट्टको इजलाशले लामो सुनुवाईपछि आज फैसला सुनाएको हो। फैसला लगत्तै मन्त्री गुप्ताले प्रहरी समक्ष आत्मसमर्पण गरिसकेका छन्। यसरी आत्मसमर्पण गरेवापत् उनको सजाय २५ प्रतिशत कम हुने व्यवस्था छ।

Image source:imagechannel

काठमाडौँको असनमा मंगलवार बिहान भीषण आगलागी भएको छ । असन र मच्छेन्द्रबहाल नजिकै बालकुमारीमा भएको आगलागी नियन्त्रणको प्रयास भइरहेको जनसेवा प्रहरीले जनाएको छ ।आगलागी नियन्त्रणका लागि काठमाडौँ महानगरपालिका, नेपाली सेना र प्रहरीका गरी ५ वटा दमकलले प्रयास गरिरहेको थापाले बताउनुभयो । यस्तै आगो निभाउन नेपाल प्रहरी, सशस्त्र प्रहरी, नेपाली सेना र स्थानीय बासिन्दा प्रयासरत छन् ।

घरको सबभन्दा तत्लो तल्लामा रहेको रेष्टुरेन्टबाट सल्केको आगोले पूरै घरमा क्षति पु-याएको छ । आगलागीकै कारण सँगै रहेका अरु दुई घरमा पनि सामान्य क्षति पुगेको छ । आगलागीबाट घरमा रहेका सामग्री जलेर नष्ट भएका छन् । साँघुरो बाटो भएका कारण दमकल र एम्बुलेन्सलाई आगो नियन्त्रणमा लिन निकै कठीन प¥यो । सर्वसाधारणको भीड र साँघुरो बाटोको कारण दमकल छिर्न नसकेपछि प्रहरी परिचालन गरी बाटोमा आवतजावतमा गर्न नै रोक लगाउनुप-यो । विहान साढे सात बजेदेखि सल्केको आगो अझै पूर्ण नियन्त्रणमा आएको छैन । आगलागीका कारण खुल्न सकेको छैन भने मानवीय क्षति नभएको प्रहरीले जनाएको छ ।

courtesy:nagarik

आज महाशिवरात्री पर्व मुलुकभर परम्पराअनुसार मनाइँदैछ । शिवरात्रीको अवसरमा मुलुकभरका शिवालयहरुमा दर्शनार्थीको भीड लागेको छ ।

काठमाडौँको पशुपति क्षेत्रमा नेपाल तथा भारतबाटसमेत ठूलो संख्यामा दर्शनार्थीको घुइँचो लागेको छ । पशुपति क्षेत्रमा बिहान ३ बजेदेखि नै दर्शन गर्नेहरुको लामो लाइन लागेको छ । पशुपति क्षेत्र विकास कोषले दर्शनार्थीलाई चारवटा लाइनमार्फत मन्दिर प्रवेशको व्यवस्था मिलाएको छ । कोषले आज दिनभरिमा करिब ८ लाख दर्शनार्थीले पशुपतिको दर्शन गर्ने अनुमान गरेको छ । आज सोमबार परेका कारण पनि यसअघिको तुलनामा दर्शनार्थीको बढी घुइँचो लागेको कोषले बताएको छ । शिवरात्रीका दिन भगवान शिवको दर्शन तथा पूजा आराधना गर्नाले मानिसले सुख, शान्ति तथा समृद्धि प्राप्त गर्ने जनविश्वास रहिआएको छ ।

यसैबीच पशुपति क्षेत्रको सुरक्षाका लागि ठूलो संख्यामा सुरक्षाकर्मी परिचालन गरिएको छ । महानगरीय प्रहरी परिसर हनुमानढोकाका प्रमुख प्रहरी उपरीक्षक राजेन्द्र श्रेष्ठले दर्शनार्थीको सुरक्षा र भीड नियन्त्रणका लागि चार हजारभन्दा बढी संख्यामा प्रहरी खटाइएको जानकारी दिनुभयो । यस्तै मारवाडी सेवा समितिलगायत विभिन्न संघसंस्थाले दर्शनार्थीको भीड व्यवस्थापनका लागि सयौंको संख्यामा स्वयंसेवक परिचालन गरेका छन् ।

यस्तै आकस्मिक उपचारका लागि विशेषज्ञ चिकित्सकसहितको स्वास्थ्कर्मी टोली खटाइएको छ । पशुपति क्षेत्र विकास कोषले पहिलोपटक यसपालिदेखि मन्दिरमा भक्तजनले चढाएको भेटी कोषको खातामा जम्मा गर्ने भएको छ । यसअघि पूजाबापतको भेटी भट्ट र मन्दिरमा चढाएको भेटी भण्डारीहरुले बाँडेर लिने गरेका थिए । यसपालिदेखि भने उनीहरुले भेटी नभई पारिश्रमिक पाउनेछन् ।

शिवरात्रीको अवसरमा पशुपतिका अलावा ललितपुरको कुम्भेश्वर, खोटाङको हलेसीलगायतका शिवालयमा पनि बाक्लो संख्यामा शिव भक्तहरु पूजा आजाका लागि भेला भएका छन् । यसैबीच महाशिवरात्री तथा सेना दिवसका अवसरमा नेपाली सेनाले आज राजधानीको सैनिक मञ्च टुँडिखेलमा विशेष समारोह आयोजना गर्दैछ । परमाधिपतिका हैसियतले राष्ट्रपति डा. रामवरण यादवले उत्कृष्ट गणहरुलाई निशान प्रदान गर्ने कार्यक्रम छ । नेपाली सेनाले विगत २१ वर्षदेखि सेनाले महाशिवरात्रीका दिन सेना दिवस मनाउँदै आएको छ ।

समारोहमा नेपाली सेनाका विभिन्न युनिटद्वारा मार्चपास, हातहतियार, तोपखाना र विकास निर्माणसम्बन्धी गतिविधिसँग सम्बन्धित कलाकौशल प्रदर्शन गरिने सैनिक मुख्यालयले जनाएको छ ।

महाशिवरात्रिमा पवित्र पाशुपत क्षेत्र पशुपतिनाथ मन्दिर दर्शन गर्नका लागि आउने स्वदेशी तथा विदेशी साधुसन्त तथा नाङ्गाबाबाको सङ्ख्यामा कमी आएको छ।

कोषका कोषाध्यक्ष नरोत्तम वैद्यले गत वर्षको महाशिवरात्रिमा पशुपतिनाथ मन्दिरमा करिब दश हजार साधुसन्त आएकोमा यसपटक हिजोसम्म तीन हजार ५०० जना आएको जानकारी दिए।

महाशिवरात्रिका अवसरमा विशेषगरी भारतबाट आउने नाङ्गाबाबा र मुलुकका विभिन्न स्थानबाट साधुसन्तहरू पशुपति क्षेत्रमा आउने प्रचलन रहेकोमा यसपटक भारतको इलाहावाद प्रयागमा कुम्भमेला भइरहेकाले साधुसन्त कम आएको अनुमान पशुपति क्षेत्र विकास कोषको अनुमान छ।

महाशिवरात्रिका अवसरमा स्वदेश तथा विदेशका विभिन्न स्थानबाट पशुपतिनाथ मन्दिरको दर्शन गर्न आउने साधुसन्तलाई पशुपति क्षेत्र विकास कोष र गुठी संस्थानले सत्कारस्वरूप दक्षिणा दिने प्रचलन रहेको छ। रासस

प्रहरीसँगको झडपमा परी आज बिहान चितवनमा एक युवकको मृत्यु भएको छ ।

मृत्यु हुनेमा सिमभञ्ज्याङका रविन गुरुङ रहेका छन् । कुटाइबाट स्थानीय युवकको मृत्यु भएको विरोधमा मृतकका आफन्त र स्थानीयले गरेको यातायत बन्दका कारण चितवनको नारायणगढ-मुग्लिङ सडकखण्डमा यातायात ठप्प भएको छ । सवारी साधनलाई बीच सडकमा रोकेर शिवरात्री पर्वका लागि भन्दै रकम माग गरिरहेका चण्डी भञ्ज्याङका युवा र त्यसलाई रोक्न खोज्ने प्रहरीबीच भएको झडपमा गुरुङको मृत्यु भएको हो । प्रहरीसँगको झडपमा गम्भीर घाइते भएका १८ वर्षीय गुरुङको भरतपुर अस्पतालमा उपचारका क्रममा मृत्यु भएको थियो ।

यसैबीच घटनाको बिरोधमा स्थानीय र मृतकका आफन्तले नारायणगढ-मुग्लिङ सडकखण्ड अवरुद्ध गरेका छन् । उनीहरुले सडकमा ढुंगामुढा तेस्र्याएर प्रदर्शन गरेका कारण मुग्लिङबाट नारायणगढ र नारायणगढबाट मुग्लिङतर्फ जाने निजी तथा सार्वजनिक सवारी साधन चल्न नसकेको इलाका प्रहरी कार्यालय मुग्लिङले जनाएको छ । स्थानीय र मृतकका आफन्तले घटनाको सत्यतथ्य छानविन गरी दोषीमाथि कारबाही नभएसम्म यातायातका साधन सञ्चालन हुन नदिने बताएका छन् ।

source:imagechannel

पूर्व रानी कोमल शाहको ६२ औं जन्मदिन आज बिभिन्न कार्यक्रम गरी मनाइएको छ । जन्मोत्सव नागरिक मुल समारोह समितिले तीन दिनसम्म पूर्व रानी कोमलको जन्मदिन मनाउने जनाएको छ । पूर्व रानी कोमललाई आज निर्मल निवास पुगेर राजावादी र शुभेचछुकहरुले जन्मदिनको शुभकामना दिएका थिए । शुभकामना दिन निर्मल निवास परिसरमा लामो लाइन लागेको थियो ।

विक्रम सम्वत २००७ सालमा १ सय ४ वर्षे जहानिया राणाशासनको अन्त्य भएर देशमा प्रजातन्त्रको स्थापना भएको दिनको सम्झनामा हरेक वर्ष फागुन सात गते प्रजातन्त्र दिवस मनाइन्छ ।दिवसका अवसरमा देशभरी नै विभिन्न कार्यक्रम हुँदैछन् । तर सरकारले यसवर्ष प्रजातन्त्र दिवसको औपचारिक कार्यक्रम भने नगर्ने भएको छ । गतवर्षसम्म काठमाण्डौं टुंडिखेलमा विशेष कार्यक्रम गरी प्रजातन्त्र दिवस मनाएको भएपनि यसवर्ष यस्तो कुनै कार्यक्रम आयोजना गरिएको छैन । प्रजातन्त्र दिवस मनाउने-नमनाउनेबारे सरकारले औपचारिक जानकारी नदिएपनि प्रधानमन्त्रीको निर्देशनमा कार्यक्रम आयोजना नगरिएको स्रोतले जनाएको छ । प्रधानमन्त्रीबाट प्रजातन्त्र दिवसको अवसरमा शुभकामना सन्देश पनि आएको छैन । प्रजातन्त्र दिवसको अवसरमा सरकारले आज सार्वजनिक विदा दिएको छ ।

राष्ट्रपति डाक्टर रामवरण यादवले भने प्रजातन्त्र दिवसको अवसरमा शुभकामना सन्देश दिंदै ऐतिहासिक संविधानसभाबाट राष्ट्रिय अखण्डता, सार्वभौमिकता र राष्ट्रिय एकता सदृढ गर्न र आपसी विश्वास, सहमति र सहकार्यद्वारा लोकतान्त्रिक संविधान निर्माण गरी देशमा स्थायी शान्ति कायम गर्न आहृवान गर्नुभएको छ । यस्तै पूर्व राजा ज्ञानेन्द्र शाहले शुभकामना सन्देश दिँदै प्रजातन्त्रलाई व्यवहारमा लागु गर्नुपर्नेमा जोड दिनुभएको छ ।

देशकै पहिलो गाई प्रजनन केन्द्र चितवनमा स्थापना भएको छ। पश्चिम चितवन गीतानगरका गाईपालक किसानहरुको सक्रियतामा सिमाना जोडएको पारसनगरमा नश्ल सुधारसहितको गाई प्रजनन केन्द्र स्थापना गरिएको हो। पारसनगर वडा नं‍. ८ मा एक विघा ५ कठ्ठा जग्गामा पशु विकास स्रोत केन्द्रका नाममा यो केन्द्र स्थापना गरिएको हो।
नयाँ तथा स्थानीय पुराना गाईको नश्ल सुधार गरेर अझ नयाँ जात र धेरै दूध दिने गाई उत्पादन गर्ने लक्ष्य प्रजनन केन्द्रले लिएको छ। स्थानीय अन्नपूर्ण दुग्ध उत्पादक सहकारीले गाई प्रजनन केन्द्र स्थापनाको नेतृत्व लिएको छ।

बोक्सीको आरोपमा महिलाको हत्या गरिएको विरोधमा स्थानीय बासिन्दाले चितवनको माडी बन्द गराएका छन् । बोक्सीको आरोपमा हिजो जिउँदै जलाएर हत्या गरिएकी बगौडा २ की भेगनीदेवी महतोका हत्यारालाई कारवाही तथा मृतकका परिवारलाई राहातको माग गर्दै स्थानीय बासिन्दा विरोधमा उत्रिएका हुन् ।

स्थानीय बासिन्दाको प्रदर्शनका कारण माडी क्षेत्रमा गाडि चल्न सकेका छैनन् । महतोलाई उनकै जेठाजुको परिवारले हिजो हत्या गरेको थियो । प्रहरीले हत्यामा संलग्न रहेको १० जनालाई पक्राउ गरेको छ । मृतकको शव अझै उठ्न सकेको छैन ।

चितवनमा बोक्सीको आरोपमा शुक्रबार बिहान एक महिलाको निर्ममता पुर्बक हत्या भएको छ । चितवनको माडी क्षेत्रमा पर्ने बघौडा २ गोठवा टोलमा बस्ने अन्दाजी ४० बर्षकी ढेगनी देबी महतोको हत्या भएको ईलाका प्रहरी कार्यालय माडीका प्रहरी निरिक्षक गोबिन्द सिंह ठकुरीले जानकारी दिनु भयो । महतोलाई आज बिहान आफ्नो गोठमा गोबर फाल्न गएको बेला दश जनाको समूहले काठ, दाउरा, घरेलु हतियारले कुटेर रगतपच्छे बनाएपछि मट्टितेल छर्केर आगो लगाएको स्थानीयले जानकारी दिए।

महतोलाई जोगाउन गएका अन्य छिमेकीलाई पनि खुकुरी र हतियार देखाएर नजिक जान नदिएको स्थानीय कृष्ण चौधरीले बताए।

उनका अनुसार मृत ढेगनीदेवीको मुखमा पराल कोचेर मट्टितेल हाली जलाइएको थियो। जग्गा सम्बन्धी विवाद पहिलेदेखि रहेकोले रिसइबीमा महतोको हत्या गरिएको अनुमान स्थानीयले गरेका छन। प्रहरीले पनि आपसी रिसइबीले हत्या भएको शंका गरेको छ।

आगो लगाइएको अवस्थामा शव फेला परेको माडीका प्रहरी निरीक्षक गोविन्द सिंह ठकुरीले नागरिकन्युजलाई बताए।

घटनामा संलग्न रहेका महतोकी छोरी रन्जु र ज्वाँई बिक्रम महतो, स्थानीय बिक्रमिया महतो, सन्जु महतो, कृष्ण महतोसहित आठजनालाई प्रहरीले पक्राउ गरेको छ। पक्राउ परेकाहरु झाँक्री र देउता लागेका जसरी काम्ने, केही नबोल्ने जस्ता कृयाकलाप गरिरहेको प्रहरीले बताएको छ। प्रहरीका अनुसार उनीहरुले महतोलाई बोक्सी भएको आरोप समेत लगाएका छन्।